«აფხაზეთის, სამხრეთ ოსეთის, დნესტრისპირეთისა და ყირიმის შედარება შეუძლებელია» - რას ფიქრობს ნავალნი კონფლიქტებზე

2017-06-15 13:10:34
1172

რუსული ტელეკომპანია »Дождь»-ის გადაცემაში ტელეწამყვანი ქსენია სობჩაკი ოპოზიციონერ ლიდერ ალექსეი ნავალნის პოსტსაბჭოთა სივრცეში არსებულ კონფლიქტებზე, მათ შორის აფხაზეთის, ე.წ. სამხრეთ ოსეთისა და ყირიმის თემებზე ესაუბრა. «აქცენტი» ამ ტელეინტერვიუდან ამონარიდების ქართულ თარგმანს გთავაზობთ:
 
- თავის დროზე, 2008 წელს თქვენ გამოდიოდით მოწოდებით აფხაზეთისა და სამხრეთ ოსეთის დამოუკიდებლობის აღიარების შესახებ...

- დნესტრისპირეთის...

- არა მარტო - დნესტრისპირეთის, აფხაზეთისაც და სამხრეთ ოსეთისაც...

- დიახ, დიახ. ეს იყო მოძრაობის „ხალხი“ მანიფესტი და გამოვდიოდი დამოუკიდებლობის აღიარების მოწოდებით.

- ამასთან, როდესაც პუტინმა ყირიმში გააკეთა ის, რისკენაც თქვენ აფხაზეთთან და სამხრეთ ოსეთთან დაკავშირებით მოუწოდებდით, თქვენ იმთავითვე წინააღმდეგი იყავით. მეტსაც გეტყვით, გამოდიოდით მოწოდებით, ფრთოსანი რაკეტები გაგვეშვა გენშტაბის მიმართულებით...

- ეს ალბათ, ყირიმთან კი არა, საქართველოსთან დაკავშირებით ვთქვი.

- და შემდგომში, როდესაც პუტინმა ყირიმი მიიერთა, რატომღაც თქვით, რომ ეს სხვა სიტუაცია იყო. გამაგებინეთ, რაშია სხვაობა?

- თქვენ თავად გაეცით პასუხი თქვენს კიტყვას: ეს იყო სხვა სიტუაცია. აფხაზეთი და სამხრეთ ოსეთი – ეს არის რეგიონები, რომლებმაც იმთავითვე, საბჭოთა კავშირის დაშლის მომენტიდან გასვლის შესახებ განაცხადეს. იქ იყო სისხლიანი მოვლენები, იქ იყო ფაქტობრივად ომი...

- ყირიმის ისტორია იცით?

- ვიცი. და რამდენადაც ვიცი, არც 90–იან, არც ნულოვან წლებში იქ არანაირი რეალური ძალადობა არ ყოფილა, ამდენად, ამ სიტუაციების შედარება არ შეიძლება.

- იური მეშკოვის შესახებ თუ გსმენიათ?

- არა.

- ის ყირიმის პრეზიდენტი იყო...

- და რა?

- ... რომელმაც განაცხადა, რომ ყირიმი რუსეთის ნაწილია...

- და რა?

- ეს 90–იან წლებში მოხდა და ეს კაცი ყირიმელი ხალხის მიერ იყო არჩეული. ანუ, იმის თქმა მინდა, რომ იმ დროს ყირიმშიც იგივე პროცესები ვითარდებოდა, რაც აფხაზეთსა და სამხრეთ ოსეთში...

- შეუძლებელია, შევადაროთ აფხაზეთი, სადაც ომი მიმდინარეობდა და რომელიც ფაქტობრივად, დამოუკიდებელი იყო საქართველოსგან მრავალი წლის განმავლობაში და ახლაც დამოუკიდებელია, არ შეიძლება, შევადაროთ დნესტრისპირეთი, რომელიც ასევე მრავალი წლის განმავლობაში იყო დამოუკიდებელი მოლდოვასგან, ყირიმსა და უკრაინას.

- დიახ, ყირიმში ომი არ ყოფილა, მაგრამ იქაც იგივე პროცესი ვითარდებოდა და მათაც გამოთქვეს დამოუკიდებლობის სურვილი...

- პროცესი და ომი სხვადასხვა რამაა. პროცესი და რეალური დამოუკიდებლობა სხვადასხვა რამაა. ამდენად, ჩვენ შეგვიძლია, ეს ყველაფერი განვიხილოთ, მაგრამ მე მოგიწოდებთ, გააცნობიეროთ, რომ შეუძლებელია „მძიმეებით“ გამოვყოთ აფხაზეთი, ოსეთი, დნესტნისპირეთი და ყირიმი – ეს აბსოლუტურად განსხვავებული სიტუაციებია.

- კარგით. ერთის მხრივ, თქვენ ამბობთ, რომ ყირიმი აღარასდროს გახდება უკრაინის ნაწილი, და ამავე დროს, ამბობთ, რომ აუცილებელია, ჩატარდეს რეფერენდუმი - უკვე მეორე. თქვენ სერიოზულად ფიქრობთ, რომ უკრაინა მეორე რეფერენდუმს დაუშვებს ყირიმის რუსეთთან მიერთების თაობაზე?

- მე ამას არ ვამბობ ერთის და მეორეს მხრივ, მე ყველაფერს ერთის მხრივ ვამბობ. მე ვსაუბრობ რეალისტურად. ვიცი, რომ ჩემი სიტყვები ბევრს არ მოსწონს უკრაინაში, ბევრს არ მოსწონს რუსეთში, მაგრამ ვამბობ იმას, რაც არის: რეალურად, ჩვენ ვხედავთ, რომ თვალსაწიერ მომავალში ყირიმი, რა თქმა უნდა, არავის მიერ იქნება აღიარებული, მაგრამ ფაქტობრივად, რუსეთის ფედერაციის შემადგენლობაში დარჩება. რა უნდა გააკეთოს ამ ვითარებაში ნორმალურმა პრეზიდენტმა? - მან უნდა გამოაცხადოს კიდევ ერთი რეფერენდუმი, ოღონდ ეს უნდა იყოს პირველი ნორმალური, სამართლიანი რეფერენდუმი, რომლის შედეგებს უკრაინა, მაღალი ალბათობით, არ აღიარებს...

- მაშინ რა აზრი აქვს მის ჩატარებას?

- აქ ხომ რუსეთსა და უკრაინაში არ არის საქმე, აქ საუბარია ხალხის რეალური ნების გამოვლინებაზე.

- კი, მაგრამ ყირიმელმა ხალხმა ერთ რეფერენდუმზე უკვე გამოავლინა თავისი ნება. თქვენ მას არ ენდობით?

- განა ყირიმელი ხალხის ნებას არ ვენდობი, უბრალოდ რეფერენდუმი, რომელიც უკვე ჩატარდა, დაუფარავი ფალსიფიკაცია იყო. ჩვენ უნდა ჩავატაროთ ნორმალური რეფერენდუმი. ეს – პირველი. მეორე...

- მე მაინც არ მესმის, რა საჭიროა მეორე, მესამე, მეოთხე რეფერენდუმი, თუ წინდაწინვე ცნობილია, რომ მის შედეგებს არავინ აღიარებს?! ეს რა, საკუთარი სინდისის დასამშვიდებლად უნდა გავაკეთოთ?

- სინდისის დამშვიდება არაფერ შუაშია, ამას ხალხის რეალური ნების დაფიქსირება ჰქვია. ჩვენ ხომ რეალურ ხალხზე ვსაუბრობთ! მე, თქვენგან განსხვავებით, ვთვლი, რომ ჩვენ უნდა ვიცოდეთ მათი რეალური აზრი. ისინი უნდა მოვიდნენ რეალურ რეფერენდუმზე და გამოავლინონ საკუთარი ნება, რათა ის ყველამ ვიცოდეთ.

- გასაგებია, მაგრამ წინდაწინვე ვიცით, რომ უკრაინა ამ შედეგებს არ აღიარებს და ასეთ პირობებში რას ელით?

- იცით, თქვენი მსჯელობა ძალიან მაგონებს ახლა თავად რუსეთში პუტინზე მიმდინარე მსჯელობებს: „რაში გვჭირდება სამართლიანი არჩევნები, თუ წინასწარ ვიცით, რომ არაფერი შეიცვლებაო?“...

- ნუ გადაგყავთ საუბარი სხვა თემაზე. ყირიმს ვიბრუნებთ თუ არა?

- რა უცნაური, წარმოუდგენელი დასმაა საკითხის... კიდევ ვიმეორებ, პირველი: არ არსებობს მარტივი გადაწყვეტილება; მეორე – როგორც ჩანს, გადაწყვეტილება საერთოდ არ არსებობს, ისევე, როგორც არ არსებობს არც ერთი ტერიტორიული კონფლიქტის გადაწყვეტა პლანეტა დედამიწაზე ბოლო წლების განმავლობაში. ცივილიზებულ ქვეყნებს შორისაც კი არ არსებობს პრაქტიკულად არც ერთი პრეცედენტი, როდესაც ტერიტორიული კონფლიქტი ცივილიზებულად, ნორმალურად მოგვარდა.


ტექსტი შეიცავს ტოპონიმებსა და ტერმინოლოგიას, რომელიც ოკუპირებულ ე.წ. სამხრეთ ოსეთში გამოიყენება

ახალი ამბების სააგენტო „აქცენტი“