სააკაშვილი დასავლეთს მიმართავს: „დასავლეთმა თითქმის უარი თქვა უკრაინაზე"

2017-12-07 09:14:30
441

საქართველოს მესამე პრეზიდენტი, ოდესის ოლქის ყოფილი გუბერნაორი მიხეილ სააკაშვილი დასავლეთს მოუწოდებს, უკრაინაზე უარი არ თქვას. აღნიშნული განცხადება მან ამერიკული კატონის ინსტიტუტის კონფერენციაზე გააკეთა.

კვლევითი და საგანმანათლებლო ორგანიზაციის ღონისძიების მონაწილეებს, რომლებიც უკრაინაში ბოლო წლების განმავლობაში მიმდინარე მოვლენებს განიხილავდნენ, მიხეილ სააკაშვილი კარვების ქალაქიდან ჩაერთო.

მისი თქმით, პეტრო პოროშენკოს ხელისუფლება ხელს უშლის ანტიკორუფციული ორგანოების საქმიანობას, თუმცა უკრაინაში დასავლური ღირებულებების მქონე ახალგაზრდა პილიტიკოსებიც არსებობენ, რომლებიც დასავლეთის ნამდვილ მოკავშირეებს წარმოადგენენ.

„დასავლეთმა თითქმის უარი თქვა უკრაინაზე. ჩემი მეგობრებისგან ვისმენ ინფორმაციას, რის დამტკიცებასაც ადგილობრივი ოლიგარქები ცდილობენ, რომ უკრაინა დაკარგულია, მის სათავეში ყოველთვის ოლიგარქები იქნებიან და საზოგადოებას არ შესწევს ძალა, ააშენოს ნორმალური ქვეყანა. მოვუწოდებ დასავლეთს, ხელი არ აიღოს უკრაინელ ხალხზე, რომელიც ძალიან შრომისმოყვარე და ნიჭიერია. მათ, ვინც ამჟამად ანტიკორუფციული ბიუროს საქმიანობის ბლოკირებას ახდენს და კორიფციული გარიგებების გამოძიებას ხელს უშლის, საბანკო ანგარიშები სწორედ ევროპასა და ამერიკაში აქვთ. დასავლეთს შეუძლია ეს მათზე ზეწოლის მოსახდენად გამოიყენოს," - აცხადებს მიხეილ სააკაშვილი.