მთავრობის ადმინისტრაციასთან ვითარება პერიოდულად იძაბება.

სამართალდამცველები დემონსტრანტებს მთავრობის ადმინისტრაციის შესასვლელთან მიახლოების საშუალებას არ აძლევენ.

აქციაზე მყოფი ოპოზიციონერი პოლიტიკოსები პრემიერ–მინისტრ ირაკლი კობახიძესთან შეხვედრას მოითხოვენ.

„უნდა შევიდეთ, ან აქეთ ჩამოვიდეს, ვისაც უნდა. მიზანი შესვლა და ლაპარაკია“, - ასე უპასუხა პოლიტიკური პარტია „ახალის“ ერთ-ერთმა ლიდერმა ნიკა გვარამიამ პოლიციას, მთავრობის კანცელარიის წინ, კითხვაზე, თუ რატომ მიიწევდნენ აქციის მონაწილეები მთავრობის შენობის მიმართულებით.

აქციის ერთ-ერთი წამყვანის, ლევან ცუცქირიძის განცხადებით, პარლამენტიდან მთავრობის ადმინისტრაციასთან გადანაცვლების შემდეგ ხელისუფლებისგან "აგენტების" შესახებ კანონპროექტის უკან გაწვევას და აქციებზე დაკავებულების გათავისუფლებას მოითხოვენ. ასევე, შეკრებილების მოთხოვნაა, აქციაზე გავიდეს პრემიერ-მინისტრი ირაკლი კობახიძე.