ოფიციალური თბილისი: იტალიის ხელისუფლება საქართველოს ოკუპირებულ რეგიონებთან გაფორმებულ ნებისმიერ დოკუმენტს ბათილად მიიჩნევს

2018-08-31 14:06:34
1701

ოფიციალური თბილისი იტალიის რიგით მერვე ქალაქსა და ცხინვალის დე ფაქტო ხელისუფლებას შორის თანამშრომლობის შესახებ ე.წ. შეთანხმების გაფორმებას ეხმიენება და აცხადებს, რომ მსგავს დოკუმენტებს როგორც საქართველოს, ისე იტალიის ცენტრალური ხელისუფლებები ბათილად მიიჩნევენ.

ამის შესახებ საქართველოს საგარეო საქმეთა სამინისტროს  პრესისა და ინფორმაციის დეპარტამენტის მიერ "აქცენტისთვის“ მიწოდებულ ოფიციალურ კომენტარშია ნათქვამი:

„საგულისხმოა რომ იტალიის  ცალკეულ პატარა ქალაქებთან საოკუპაციო რეჟიმების წარმომადგენელთა უკანონო კონტაქტები ხშირ შემთხვევაში გამომდინარეობს იქიდან, რომ საოკუპაციო რეჟიმის წარმომადგენლებს შეცდომაში შეჰყავთ ადგილობრივი კერძო პირები და მათი მეშვეობით ცდილობენ კავშირების  დამყარებას სხვადასხვა წრეებთან. მნიშვნელოვანია, რომ  თავად რუსეთის ფედერაცია არ აკლებს ძალისხმევას და  ხელს უწყობს ამ უკანონო კავშირებს, რაშიც ხშირ შემთხვევაში მნიშვნელოვანი ფინანსური რესურსი იხარჯება. რუსეთი ამ გზით ცდილობს, მოახდინოს მიმდინარე უკანონო ოკუპაციის ერთგვარი ლეგიტიმაცია. მაგრამ ეს მცდელობა არის უშედეგო. საერთაშორისო თანამეგობრობა ერთიანია საქართველოს ტერიტორიული მთლიანობის მხარდაჭერაში. მათ შორის იტალია, ევროკავშირის სხვა დანარჩენ სახელმწიფოებთან ერთად, მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას.

იტალიის მთავრობა აქტიურ ძალისხმევას ეწევა ასევე არაღიარების პოლიტიკის გატარებაში, მათ შორის, იტალიის რეგიონებსა და ქალაქებში. თავად იტალიის საგარეო საქმეთა სამინისტროს არაერთხელ გაუკეთებია საოკუპაციო რეჟიმების უკანონო მცდელობების დამგმობი კომენტარები და დაუფიქსირებია საქართველოს ტერიტორიული მთლიანობის მხარდამჭერი განცხადებები. რაც შეეხება ე.წ. შეთანხმებების დადებას, თავად იტალიის მხარეს არაერთხელ  განუმარტავს, რომ ნებისმიერი დოკუმენტი, რომელიც ეწინააღმდეგება იტალიის კანონმდებლობასა თუ საგარეო პოლიტიკურ პოზიციას (მათ შორის საქართველოს ოკუპირებული რეგიონების არაღიარების პოლიტიკასთან მიმართებაში), ბათილია ხელმოწერისთანავე.

ზოგადად ოკუპირებული რეგიონების არაღიარების პოლიტიკის თანმიმდევრულად გატარება საქართველოს საგარეო უწყების საქმიანობის ერთ-ერთ უმნიშვნელოვანეს მიმართულებას წარმოადგენს. ჩვენ აქტიურად ვმუშაობთ, რათა პარტნიორ სახელმწიფოებში საზოგადოების სხვადასხვა წრეებს ჰქონდეთ ობიექტური ინფორმაცია საქართველოს განუყოფელი რეგიონების უკანონო ოკუპაციისა და ადგილზე არსებული ვითარების შესახებ.

ბოლო წლების განმავლობაში ამ მიმართულებით გაკეთდა ძალიან ბევრი. მათ შორის  ამ ძალისხმევის შედეგად, უპრეცედენტოდ გაიზარდა საერთაშორისო მხარდაჭერა, რაც გამოიხატება, როგორც საერთაშორისო ორგანიზაციებისა და ცალკეული ქვეყნების მხარდამჭერ განცხადებებში, რეზოლუციებში, გადაწყვეტილებებში, ანგარიშებსა თუ აქტებში, ისე პრაქტიკაში - არაღიარების პოლიტიკის შემდგომი კონსოლიდირებისა და  კონფლიქტის მშვიდობიანი დარეგულირების პროცესში საერთაშორისო თანამეგობრობის ქმედითი ჩართულობის სახით“.

შეგახსენებთ, რომ ცხინვალის ოკუპირებულ რეგიონს თანამშრომლობის შესახებ ე.წ ხელშეკრულებები უკვე 8 იტალიურ ქალაქთან აქვს გაფორმებული: http://accent.com.ge/ge/news/details/58757 .