რუსი ქალი (ან “ტროლი”): “მეცოდებით, ქართველებო: საქართველო გადაჯიშდა!”

2018-07-10 11:27:37
3996

აქცენტმა” უკვე არაერთი მასალა მიუძღვნა ბოლო პერიოდში ქართულ სოციალურ ქსელებში იმგვარი ვითომ “სააგენტოებისა” და “პატრიოტი მამულიშვილების” “პოსტების” მომრავლებას, რომლებიც ცდილობენ, მომხმარებელთა რაც შეიძლება, მეტ რაოდენობას მოახვიონ თავს სხვადასხვა რუსული ნარატივი, მათ შორის მტრის ხატი შექმნან როგორც დასავლეთის, ისე იმ მეზობელი სახელმწიფოების წარმომადგენლებისგან, რომლებიც საქართველოს სტუმრობენ, ან აქ მუშაობენ და ამ ფონზე, რა საკვირველია, “მხსნელად” წარმოაჩინონ რუსეთი, რომელიც “გადაგვარებისგან გადაგვარჩენს”. პარალელურად “ურუსეტოდ საქართველოს გადაგვარების” შესახებ მასალები მომრავლდა რუსულ მედიასა და სოციალურ ქსელებშიც.

ერთ-ერთ ასეთ “პოსტს” ჯგუფში “Россия – Грузия” გადავაწყდით. ქალბატონი, რომელიც Анна Железняк-ის (ანნა ჟელეზნიაკი) სახელითაა დარეგისტრირებული, ჯგუფის წევრებს საქართველოდან დაბრუნებული (ან ვითომ დაბრუნებული) ქალიშვილის შთაბეჭდილებებს უზიარებს, “უსამძიმრებს გადაგვარებულ საქართველოს” და აღშფოთებას გამოხატავს ოკუპაციის მუზეუმის არსებობისა და ქვეყნის პროდასავლური კურსის გამო - “ესაა ქართველების სტუმართმოყვარეობა და ხელგაშლილობაო?!”.

ჩემი ქალიშვილი ახლახანს მეგობრებთან ერთად საქართველოდან დაბრუნდა. რა გითხრათ? კარგს ვერაფერს გეტყვით! მოკლედ მოვყვები: მეტ-ნაკლებად ნორმალურად ჩაფრინდნენ, თუმცა აეროპორტში ყველანი განსაკუთრებულად გაჩხრიკეს (სტუდენტები, რუსები, ძალიან საშიში პიროვნებები, - რა თქმა უნდა, დასკანალურად უნდა შემოწმდნენ!).

კარგი, ეს - ჯანდაბას. ის, რომ ყველგან გეთავხედებიან, უკმეხად გექცევიან, გატყუებენ და ფასებს მხოლოდ რუსებს ათჯერ მაღალს უწესებენ, კიდევ არაფერი. კაფეებში, რესტორნებში და ქუჩებშიც კი ამრეზით გაქცევენ ზურგს და კითხვებზე არ გპასუხობენ. მეტიც, ერთ-ერთ ფეშენებელურ რესტორანში მათთვის არც ერთი კერძი “არ აღმოაჩნდათ”, რომელიც ითხოვეს, მწვადიც კი! ადგნენ და სხვა რესტორანში გადავიდნენ, თუმცა იქაც იგივე!

შემდეგ იყო ბათუმი: ყველგან ყველაფერი არაბებითა და ჩინელებითაა გადაჭედილი. ყველაფერი იყიდეს, თავს პატრონებად თვლიან. მათზე თავად ქართველებსაც კი უკვე გული ერევათ!

ბოტანიკურ ბაღში კი ელექტროკატერზე გასეირნების წინ ჩვენებს კონფლიქტი მოუვიდათ ქართველ ებრაელ ქალთან, რომელმაც არ ისურვა, მასთან ერთად ემგზავრათ, რადგან მან გიდს ფული გადაუხადა ექსკურსიისთვის და სურდა, ბავშვებსაც აენაზღაურებინათ მისი მომსახურების საფასური. ბოტანიკური ბაღის პერსონალი წინააღმდეგი იყო მისი ასეთი პოზიციის, თუმცა ქალი მაინც ბერავდა კონფლიქტს და მოითხოვდა, არაბები და რუსები ქართველებთან ერთად არ ჩაესვათ – ეს ხომ ტიტულარული ერია!

ფაქტობრივად, საქართველოში ძალას იკრებს ეროვნული დისკრიმინაცია. აეროპორტიდან გამგზავრებას კიდევ უფრო თავხედური “შმონი” და ბავშვებისთვის ნაჩუქარი ღვინის წართმევის მცდელობა ახლდა თან. ამასთან, გოგონების შემოწმება მამაკაცმა თანამშრომლებმა სცადეს. როდესაც ჩემმა ქალიშვილმა პროტესტი გამოთქვა და ნახეს, რომ პასპორტში ქართული გვარი ჰქონდა, უკან დაიხიეს და ქალი თანამშრომელი გამოიძახეს. ჩხრეკდნენ თმის ძირიდან ფეხის ფრჩხილამდე. მსგავსი რამ ისრაელის ავიხაზების რეისებზეც კი არ მინახავს!

ერთადერთი დადებითი შთაბეჭდილება მეღვინეობის იმ კომპანიის მონახულებაა, რომლის უფროსი რუსეთთან თანამშრომლობს და ადექვატურად იქცევა, რადგან ესმის, ვინ კვებავს მის ბიზნესს.

მეცოდებით, ქართველებო! კი, არიან ნორმალური ადამიანებიც, მაგრამ ასეთები ერთეულებია. საქართველო გადაჯიშდა.

P.S. ყველა კომენტატორს მადლობა, მაგრამ დისკუსია დასრულებულია! :) ბევრს ყბედობდნენ სტუმართმოყვარეობასა და ხელგაშლილობაზე, თუმცა ვერავინ მიპასუხა, მაშინ როგორ გაჩნდა “რუსული ოკუპაციის მუზეუმი” და რა საჭიროა რუსების მიმართ ესოდენ დიდი სიყვარულისა და მათი ქვეყანაში ხილვის სურვილის შემთხვევაში საქართველოს სწრაფვა რუსეთის საწინააღმდეგო ბლოკში [ნატო]. რიტორიკული კითხვებია! :))”.